Нова премиєра Драмского студия „Арт” – младежскей ґрупи Дома култури зоз Руского Керестура

Дньово новосци – Novosti dana

Драмски сутдио „Арт” – младежска ґрупа Дома култури зоз Руского Керестура, всоботу, 9. марца виведол нову премиєру. Була то представа „Гунцут дзивки” авторики Наталиї Уваровей, а як режисер ю подписал Владимир Надь Ачим

Дзивчата котри оставаю без пенєжох, примушени на интернет спреводзку, дзе єдна американска милионерка, котра по походзеню з України, жада подаровац пенєж лезбейскей пари, прето же єй праве тоти жени випатраю як самостойни и порихтани ше бориц за себе. Но, як цо то и у живоце часто ше случує, ситуация ше обраци та милионерка дознава же єдна од дзивчатох єй унука, а пренаходзи и власну дзивку котру була примушена охабиц кед сцекала до Америки. Цали заплєт ше круци коло двох младих дзвичатох и уж остареней и зоз животом витрапеней милионерки. Так ше на концу шицко розплєта зоз вешельом и радосно.

Млада екипа ґлумцох, помоцнєта зоз ґлумицами котри уж маю тетралне искуство, як могло вичитац зоз реакцийох публики, дала шицко од себе же би єдну за виводзенє нє легку форму – комедию ситуациї, преточела до питкей и приємей представи котра ше пред патрачовима очми одвивала лєгко, з добрим темпом и у приємней атмосфери. У улогох ше нашли млади ґлумци – Марина Надь, Ивана Планчак, Емилиян Няради, Жарко Остоїч, кус старша и у театре искуснєйша Силвия Малацко, та уж преверана ґлумица, а медзи иншим и режисерка дзецинских представох Ксения Бодянец, як и Оленка Живкович котра ше после 30 рокох врацела на „дески цо живот знача”.

Реакция публики була наисце добра и мож повесц же и сама публика „подзвигла” температуру у сали, а ґлумцох мотивовала за ище лєпше виводзенє.

У реализациї представи ище помогла и добра сценография и вибор музики котри подписує Владимир Надь Ачим, сценски роботнїк Дюра Хома, костими успишнє вибрала Татяна Орос, за шветлосни и тонски ефекти задлужени були Желько Пашо и Владимир Бесерминї, а суфлер була Сара Планчак.

Оленка Живкович / Фото „Рутенпрес

Projekat „Novosti dana: Svi jezici jedno blago – multikulturalni Novi Radio Sombor“ sufinansira se iz budžeta grada Sombora. Stavovi izneti u podržanom medijskom projektu nužno ne izražavaju stavove organa koji je dodelio sredstva.